07 июня 2008 г.
“Сельэнерго” уçă акционерлă общество коллективĕ пысăк мар – пурĕ те 15 çын. Пĕчĕк мăйăрăн тĕшши тутлă тенешкел, обществăра тăрăшакансен ÿсĕмĕ куç умĕнчех. Акă, кăçалхи тăватă уйăхра кунта 1,5 млн. тенкĕлĕх продукци туса кăларнă. Ку вăл, иртнĕ çулхи çак тапхăртипе танлаштарсан, 125 процент ытларах.
Производствăра тăрăшакансем хушшинче хальхи вăхăтра çамрăксем ытларах теме пулать. Кун пеккисем В.Иванов мастерăн, Д.Иванов машинистăн ырă тĕслĕхĕпе хавхаланса ĕçлеççĕ. Ветерансен опычĕ пысăк, вĕсем предприятире тахçантанпах вăй хураççĕ.
Паянхи кун кунта 10 тĕрлĕ пăрăх кăлараççĕ. Электромеханиксем районти шкулсенчи, садиксенчи, культура учрежденийĕсенчи, райпори электропралук изоляцине тĕрĕслесе тухнă. Çĕвĕ цехĕнче ятарлă тум-тир çĕлеççĕ. Арман та авăртаççĕ. Хăйсем хатĕрленĕ продукцине ялсене тухса сутассине те йĕркеленĕ.