28 июня 2008 г.
“Пĕтĕм Раççейри халăх çыравĕ çинчен” федераллă саккунпа килĕшÿллĕн вунă çулта пĕр хутчен кая мар халăх çыравне ирттермелле. РФ Правительствин 2006 çулхи январĕн 11-мĕшĕнчи хушăвĕнче 2010 çулта черетлĕ çырав ирттермелли çинчен каланă. Вăл патшалăхăн пур органĕсене те пырса тивĕ. Çырав патшалăхра халăх йышĕ мĕн чухлĕ пулни тата мĕнле лару-тăрура пурăнни çинчен тулли хурав памалла. Пирĕн çĕршывра пуçласа 1897 çулта çырав ирттернĕ, юлашки 2002 çулта пулнă.
Ку мероприятие тивĕçлĕ шайра ирттерес тесен хатĕрленÿ ĕçĕсене йĕркелемелле. Пирĕн районта 2010 çулта çырав ирттерес енĕпе хатĕрленÿ ĕçĕсем тума 2008 çулхи апрелĕн 4-мĕшĕнче ятарлă хушу кăларнă. Унпа килĕшÿллĕн мĕнле ĕçсем туса ирттермеллине те палăртнă. Ял тăрăхĕсенче хуçалăх кĕнекисене мĕнле çырса пынине пăхаççĕ. Картографи материалĕсене тишкереççĕ. Чăвашстатăн территори органĕсенче ĕçлекенсем ĕç тăвакан влаç тата вырăнти самоуправлени органĕсенче тăрăшакансемпе пĕрле ялсене килекенсене тата тухса каякансене регистрацилесси мĕнле шайра пулнине пăхса тухаççĕ. Урамсен ячĕсен, çуртсемпе хваттерсен номерĕсем пирки те тимлеççĕ. Чи пирвайхи хатĕрленÿ ĕçĕсене 2009 çулхи 2-мĕш кварталта вĕçлемелле. Кăçалхи июль-август уйăхĕсенче çырава йĕркелес тĕлĕшпе тĕп ĕçсем пуçланмалла, плансем хатĕрлемелле, çырав инструкторĕсем мĕн чухлĕ пулнине пĕлмелле, картографи материалĕсене тишкермелле. Халăха ăнлантарас енĕпе ĕçсем пурнăçламалла.