28 июня 2008 г.
Район пуçлăхĕ Александр Криков кăçалхи июнĕн 21-мĕшĕнче И.Н. Ульянов ячĕллĕ Чăваш патшалăх университечĕн профессорĕн, физикăпа математика ăслăлăхĕн докторĕн, актуаллă тата финанс математикин кафедра заведующийĕн Александр Юрьевич Иваницкин кĕнекисен презентацийĕнче пулнă.
А.Иваницкий 1955 çулхи октябрĕн 27-мĕшĕнче Хĕрлĕ Чутай салинче çуралнă. Чăваш патшалăх университетĕнчен, Мускаври М.В.Ломоносов ячĕллĕ патшалăх университечĕн аспирантуринчен вĕренсе тухнă. Çавăн пекех Александр Юрьевич АПШ-н Огайо штатĕнчи Каламбус хулинчи университетра акăлчан чĕлхине вĕренмелли ятарлă курс пĕтернĕ. Вăл ку таранччен 50 ăслăлăх ĕçĕ çырса хатĕрленĕ, çав шутра 6 монографи. Вĕсене Мускавра, Голландире, АПШ-ра пичетлесе кăларнă.
Нумай пулмасть тухнă “Линейное программирование” тата “Теория риска в страховании” кĕнекисемпе математикăпа экономика специальноçĕсене вĕренекен студентсем, кунпа пĕрлех финанс тишкерĕвĕпе страховани енĕпе ĕçлекен специалистсем усă курма пултараççĕ.
Кĕнекесен презентацине ЧПУ ректорĕ Лев Кураков уçнă, хăнасене Александр Юрьевичăн профессиллĕ ĕç-хĕлĕпе паллаштарнă. Вăл теорие практикăпа тачă çыхăнтарса пынине, хăй мĕн пĕлнине студентсене вĕрентсе воспитани парас ĕçре усă курнине палăртнă.
Нумай кĕнекесен авторĕн ĕçне ЧР Министрсен Кабинечĕн председателĕ Сергей Гапликов, РФ Патшалăх Думин Çĕршывсен хушшинчи ĕçсен комитечĕн председателĕ Константин Косачев пысăка хурса хакланă.
Хăнасем умĕнче район пуçлăхĕ Александр Криков тухса калаçнă. Çакна палăртнă: Александр Юрьевичăн лайăх пахалăхсем пур, вăл хăйĕн çывăхĕнчи çынсене лайăх витĕм кÿрет. А.Иваницкий – Хĕрлĕ Чутай районĕн кăна мар, пĕтĕм Чăваш Енĕн мухтавĕ. Александр Иванович хăйĕн ентешне малашне те ăнăçлă ĕçлеме ырлăх-сывлăх суннă. ЧПУ-н алгебрăпа геометри кафедрин заведующийĕ Юрий Семенов профессор кĕнекисем вăхăтра тата паянхи кун ыйтнă пек тухнăшăн автора тав тунă.
Кĕнекесен презентацине А.Иваницкин юлташĕсем, пĕрле ĕçлекенсем хутшăннă, вĕсем унăн творчествипе, педагогика ĕçĕ-хĕлĕпе паллаштарнă. Автор кĕнекесем епле çурални, мĕнле материалсемпе усă курни çинчен каласа панă, хăйĕн малашнехи ĕмĕт-тĕллевĕсемпе паллаштарнă.