28 июня 2008 г.
Хĕрлĕ Чутай райповĕн аптека пункчĕ Çĕнĕ центрта, универмаг çуртĕнче вырнаçнă. Унта кулленех халăх йышлă пулнине куратăн. Хальхи пурнăçра çын сывлăхне сыхласси çине тимлĕ пăхаççĕ-ха. Çапах тĕрлĕ чир-чĕрпе аптăракансен йышĕ пысăк. Кун пеккисем малтан тухтăрсем патне çул тытаççĕ, сывлăхне тĕрĕслеттереççĕ, кирлĕ эмел туянма рецепт çыртараççĕ. Хыççăн вара аптекăна васкаççĕ. Шурă халатлисен – врачсемпе сестрасен тата фармацевтсен пĕрлехи ĕçĕ чирлĕ çынна ура çине тăма пулăшать.
– Райпо иртнĕ ĕмĕр вĕçĕнче, тĕрĕсрех каласан, 1997 çулта аптека пункчĕ уçрĕ, – каласа парать пункт заведующийĕ Майя Михайловна Козлова. – Ăна валли пĕчĕкрех пÿлĕм кăна уйăрса панăччĕ. Унта ĕçлеме тăвăрччĕ, çаврăнкалама та çукчĕ. Килекенсем медикаментсемпе çывăхран паллашаймастчĕç. Мĕншĕн тесен вĕсене пурне те витринăсене вырнаçтарма май пулман. Ертÿçĕсем çакна шута илчĕç, аптека пунктне пысăк та çутă пÿлĕме куçарчĕç. Халĕ кунта ĕçлеме те лайăх, çынсене йышăнма та меллĕ.
Пунктра тăватă фармацевт тăрăшать. Вĕсем пурте ятарлă пĕлÿ илнĕ. Акă, Майя Михайловна хăй Анат Чутайра çуралса ÿснĕ, Чул хулари фармацевтика колледжĕнчен вĕренсе тухса алла диплом илнĕ. Валентина Денисова, Алевтина Яхатина тата Екатерина Егоркина та халĕ ăста специалистсем ĕнтĕ. Хăйсен ĕçне тÿрĕ кăмăлпа пурнăçласа пыраççĕ. Эмел туянма пыракансемпе ăшшăн калаçаççĕ, вĕсен ыйтăвĕсене хăвăрт тивĕçтерме тăрăшаççĕ. Çакна та каласа хăвармалла пулĕ. Кунта ытларах ватăсем килеççĕ. Вĕсемпе пĕр чĕлхе тупасси, хăш эмелпе мĕнле усă курмаллине ăнлантарса ярасси – фармацевтсен тивĕçĕ. Анчах çакна тума çăмăлах та мар. Пĕрин хăлхи витĕрех мар, теприн хутла вĕренни çитмест, виççĕмĕшĕн...
– Çапла, эпир врач çырса панă рецептсемпе те, вĕсемсĕр те эмелсем сутатпăр, – тет Майя Михайловна. – Çынсем саккас панипе те медикаментсем кÿрсе килетпĕр. Кунсăр пуçне кунта медицина приборĕсем, ачасем валли апат-çимĕç, тĕрлĕ курăксен чĕр таварне, харпăр хăй гигиенин хатĕрĕсене, ырă шăршăллă çусем тата ытти те туянма пулать. Кирлĕ хатĕр-хĕтĕрсемпе япаласем çителĕклĕ. Килекен çын тулли кăмăл-туйăмпа тухса кайтăр – çакă пирĕн тĕллев.
Аптека пункчĕн коллективĕ пысăк мар терĕмĕр. Анчах пĕчĕк хуранăн пăтти тутлă. Коллектив 2007 çулхи ĕç кăтартăвĕсем тăрăх Пĕтĕм Раççейри конкурсра “Потребкооперацин чи лайăх аптеки” ята çĕнсе илнĕ. Çакна çирĕплетекен Диплом вăй-хал парса тăрать те коллектива. Фармацевтсем паян ĕнерхинчен лайăхрах ĕç¬лесшĕн. Умри тĕллевсене пурнăçлама условисем пур. Райпо ертÿçисем эмелсем кÿрсе килме автотранспорт вăхăтра уйăрса параççĕ.
– Иртнĕ çул эпир республикăри потребкоопераци тытăмĕнчи аптекăсен ăмăртăвĕнче виç¬çĕмĕш вырăна тухрăмăр, – пĕлтерчĕ Майя Михайловна. – Çак çитĕнÿре пĕтĕм коллектив тăрăшулăхĕ. Фармацевт-сутуçăсем хăйсене шанса панă ĕçе юратаççĕ, малашлăха пăхса ĕçлеççĕ. Çавна май кăçалхи 5 уйăх кăтартăвĕсем те япăх мар.
Халăх сывлăхĕн хуралĕнче çирĕп тăракансене аптека пунктне пыракансем хăйсене кирлĕ эмелсемпе тивĕçтернĕшĕн тав тăваççĕ. Çав шутрах çак йĕркесен авторĕ те.