05 июля 2008 г.
Маларах службăра пулнă граждансем Етĕрнери çар комиссариачĕ урлă июнĕн 26-мĕшĕнчи тапхăрта Пермь крайĕнче çар ăсталăхне ÿстернĕ. Унта палаткăллă лагерьте 25 çын 25 кун хушши çар техникипе тата çар автомашинисемпе паллашнă, вĕсемпе çÿреме хăнăхнă. Çавăн пекех салтак пăттин тутине тепĕр хут ас тивсе пăхнă, командирсен хушăвĕсене хăвăрт тата пĕр пăркаланмасăр пурнăçланă.
Çар комиссарĕн ĕçĕсене вăхăтлăха туса пыракан А.Васильев капитан каланă тăрăх, запасри салтаксемпе сержантсем хăйсем çĕршывăн чăн-чăн хÿтĕлевçисем пулнине кăтартса панă. Пурте тав сăмахне тивĕçнĕ, хăш-пĕрисене вара çар чаçĕн командованийĕ Тав хучĕсем парса чыс тунă.