09 июля 2008 г.
Потребитель кооперацийĕн ĕçĕ-хĕлĕ яллă вырăнта лайăх аталанать. Вăл пин-пин ялти халăхăн йăла ыйтăвĕсене татса парать. Район территорийĕнчи суту-илÿ лавккисене, производство предприятийĕсене илес пулсан та, вĕсем тупăшлă ĕçлеççĕ. Потребкоопераци тытăмĕ хăйĕн ĕçне çĕнĕлле йĕркелесе пыни те çитĕнÿ патне илсе пырать: лавккасене реконструкцилеççĕ, Европăри пек самообслуживани мелĕпе суту тăвакан лавккасем уçаççĕ. Потребкооперацин пĕрлехи аптеки, ветеринари пункчĕ ĕçлеççĕ. Халăхран чĕр тавар пухассипе хатĕрлев пункчĕсене хута янă. Кооператив предприятийĕсенче ĕçе çĕнĕ технологисемпе йĕркелесе пыраççĕ. Çаксем пурте хамăр продукцие кăларассин тата сутассин калăпăшне ÿстереççĕ. Сăмах май, райпо 2008 çулхи 6 уйăхра 87320,5 пин тенкĕлĕх ваккăн тавар сутнă, плана 116,1 процент пурнăçланă. Вырăнта туса кăларнă продукцисен тавар çаврăнăшĕ 5843,5 пин тенкĕпе е 114,6 процентпа танлашать. Çăкăр завочĕ, «Янтарь» предприяти туса кăларакан продукцисене халăх тÿрех суйласа илет. Тата ытти цехсенче туса кăларнă шанчăклă, технологие çирĕп пăхăнса хатĕрленĕ апат-çимĕç те халăх кăмăлне тивĕçтерет. Çулсеренех райпо пурлăхпа техника никĕсне лайăхлатса пырать.
Сăмах май, райпо районăн экономика аталанăвне пысăк витĕм кÿрет. Коллективăн ĕçĕ курăмлă. Райпо ĕçченĕсем çулталăкăн кашни кварталĕнчех хăйсен кăтартăвĕсемпе Чăвашпотребсоюзăн предприятийĕсемпе организацийĕсем хушшинче малти вырăнсене йышăнаççĕ, Пĕтĕм Раççейри ăмăртусенче те пĕрремĕш вырăнсене тивĕçни сахал мар. Професси уявĕ çитнĕ май, райпо Канашĕн председателĕ А.Ю.Степанов суту-илÿ ĕçченĕсене пурне те ăшшăн саламларĕ, потребкоопераци тытăмĕнче тăрăшулăхпа палăрнисене, нумай çул çак ĕçре тÿрĕ кăмăлпа ĕçлекенсене Хисеп грамотисемпе премисем парса чысларĕ. Александр Юрьевич тупăш кÿрекен предприятисене асăнса хăварчĕ, малашне те тăрăшса ĕçлеме чĕнчĕ. Райпо системинче чылай çул ырми-канми тăрăшнăшăн В.А.Максюткина (председателĕн техника ыйтăвĕсемпе ĕçлекен çумĕ), В.В.Михеевапа (пасарти аслă контролер), З.П.Мидушкинана (1" гастроном сутуçи) «Раççей потребкооперацийĕнчи тава тивĕçлĕ ĕçсемшĕн» паллăпа наградăларĕç. Р.Н.Захаровапа (Пантьăк лавкки) З.И.Кондакована («Березка» ресторан) РФ Центросоюзăн Хисеп грамотисене пачĕç. Р.Ю.Краснова (Питĕркасси) «РФ потребкооперацин ветеранĕ», А.Ю. Степановпа (райпо председателĕ) В.Д.Патьянова (“Питание” ТЯО) «ЧР потребкооперацин ветеранĕ» ятсене тивĕçрĕç. Чăвашпотребсоюзăн Хисеп грамотисемпе А.Г.Александрована (Мучикасси лавкки), Ю.П.Кудряшова (водитель), Р.Б.Баринована (çăкăр завочĕ), Н.Н.Сергеевана («Центральная» кафе) хавхалантарчĕç. В.В.Михееван (Мучикассинчи лавкка заведующийĕ) ятне Чăвашпотребсоюзăн Хисеп хăми çине кĕртнĕ.