09 июля 2008 г.
Халăха ĕçпе тивĕçтерекен районти центр çул çитмен çамрăксене ĕçпе тивĕçтересси çине пысăк тимлĕх уйăрать. Акă, июнĕн 1-мĕшĕнчен тытăнса 25-мĕшĕччен районти шкулсенче 18 тултарман çамрăксенчен тăракан ĕç бригадисем тăрăшнă. Çак хушăра Мăн Этменти тата Çĕн Атикассинчи вăтам, Тури Çĕрпÿкассинчи тĕп шкулсемпе, Хăмарккари пуçламăш шкул-ача сачĕпе тата «Пилеш» ача сачĕпе килĕшÿсем туса 66 вĕренекене явăçтарнă.
Çул çитмен ачасем шкулсенчи вĕрентÿпе опыт лаптăкĕсенче, сывлăха çирĕплетмелли лагерьсенче (вăжатăй пулса), шкул библиотекисенче картотека йĕркелес енĕпе, çимĕç паракан йывăçсене пăхса тăрассипе, шкул территорийĕсене тирпейлес тĕлĕшпе, воспитательсене чи кĕçĕн ушкăнри ачасене пăхма пулăшас енĕпе тимленĕ.
Кăçалхи январь-июнь уйăхĕсенче ĕçпе тивĕçтерекен районти центр вĕрентÿ учрежденийĕсемпе пурĕ 8 килĕшÿ туса 189 вĕренекене вăхăтлăх ĕç тупса панă. Ытларах çак ĕçсене йывăр лару-тăрури, тулли мар тата нумай ачаллă çемьесенчи çамрăксене, çул çитмен ачасемпе ĕçлекен комиссинче тата шалти ĕçсен пайĕ çумĕнчи инспекцинче учетра тăракан ачасене явăçтарнă.
Шкул ачисем Аслă Отечественнăй вăрçа хутшăннă ветерансене, инвалидсене, ватăсене социаллă пулăшупа тивĕçтернĕ. Питĕркассинчи вăтам шкулти ĕç бригадин ачисем тăтăшах ял тăрăхĕн территорийĕнчи палăка пăхса тăраççĕ, В.Ф.Гаврилов ĕçпе вăрçă ветеранне пулăшаççĕ. Хусанушкăнь шкулĕнчи вĕренекенсем те çар мухтавĕн палăкне тата обелискне пăхса тăрассипе, çывăхри территорисене тирпейлессипе сахал мар ĕçлеççĕ.
Çул çитмен çамрăксем коллективпа пурнăçламалли ĕçе хутшăнса материаллă пулăшу та илеççĕ, ĕç коллективĕнче хăйсене тытма, харпăр хăй çине илнĕ тивĕçсемшĕн яваплă пулма хăнăхаççĕ.