12 июля 2008 г.
Кăçалхи июлĕн 5-мĕшĕнче Хĕрлĕ Чутайра вăтам шкула кунтан 1978 çулта вĕренсе тухнисем пухăнчĕç. Вăтăр çул каялла алла аттестат илнисен йышĕ 168 çынпа танлашнă. Выпускниксен 5 класĕ пулнă ун чухне. Çакна палăртмалла: паянхи район пуçлăхĕ Александр Криков та çав çулхине пурнăçăн анлă çулĕ çине тухнă.
Пухăннисене шкул директорĕ Р.Ильина саламласа вĕренÿ учрежденийĕнчи çĕнĕлĕхсемпе, ÿсĕмсемпе кĕскен паллаштарнă. Ун хыççăн выпускниксен вĕрентекенĕсем, хальхи пенсионерсем – М.Мазуркина пĕрремĕш учительница, Р.Жигулевапа В.Селенина биологсем, Ю. Трофимов физик, А.Элеменкин математик, Г.Моисеева химик, вырăс чĕлхипе литературин учителĕ Р.Галимов сăмах илнĕ.
Выпускниксем хăйсене çирĕп пĕлÿ парса пурнăç çулĕ çине тухма пулăшнăшăн учительсене тав тунă.
Тĕл пулу «Туслăх» кану зонинче вĕçленнĕ. Унта 30 çул каялла алла аттестат илнисем ачалăхри савăнăçлă вăхăта тепĕр хут аса илнĕ, пĕр-пĕрин пурнăçĕпе интересленнĕ, шкулта хăйсем лартнă улмуççисем паян чечекĕсемпе тата çимĕçĕпе савăнтарнине палăртса мăнаçланнă.