16 июля 2008 г.
Горбатовка ялĕ вăрман варринче ларать. Пурăнакансен йышĕ те пысăках мар унта. Çапах кунти çынсем туслă пулнине палăртмалла. Хăйсем умĕнчи ыйтусене вĕсем ушкăнпа, пĕр-пĕринпе канашласа татса параççĕ.
Кăçалхи июлĕн 12-мĕшĕнче, Питрав кунхине, Штанаш ял тăрăхĕн администрацийĕ Горбатовка ял уявне йĕркелесе ирттерчĕ. Унта ваттисем те, çамрăксем те, хăнасем те йышлă хутшăнчĕç. Уява ял тăрăхĕн пуçлăхĕ Николай Руссков уçрĕ, пухăннисене кăçалхи 6 уйăх кăтартăвĕсемпе, малашлăх задачисемпе паллаштарчĕ, ăшшăн саламласа ырлăх-сывлăх сунчĕ.
Питĕркассинчи Культура çурчĕ çумĕнчи “Хăмăш” фольклор ансамблĕ пысăк концертпа савăнтарчĕ. Спорт ăмăртăвĕсене хутшăнни вара Штанаш тăрăхĕнче пурăнакансене çирĕп сывлăхпа вăй-хал парнелерĕ.