19 июля 2008 г.
Кăçалхи пĕрремĕш çур çулта “Вĕрентÿ” наци проектне пурнăçласа шкулсене пулăшас тĕллевпе районта тĕрлĕ ĕçсем сахал мар туса ирттернĕ. Çак тапхăрта талантлă çамрăксене патшалăх пулăшăвĕпе тивĕçтернĕ, лайăх учительсене укçан хавхалантарнă. Кунпа пĕрлех хальхи информаци технологийĕн техника никĕсне çирĕплетес тĕлĕшпе ĕçленĕ: компьютер класĕсем валли кирлĕ оборудовани, вĕрентÿпе кăтарту пособийĕсем, шкул автобусĕсем туяннă, класс ертÿçисене хушма укçа тÿленĕ.
Çамрăк ăрăва творчествăлла аталантарас, талантлă ачасем тупса палăртас тесе “Зарница” тата “Орленок” çарпа спорт вăййисене, ачасен пĕрлешĕвĕн фестивальне, “Самый классный классный” конкурс тата ытти мероприятисем йĕркеленĕ. Халĕ пур шкулсене те Интернетпа çыхăнтарнă. Ку ачасене тарăн пĕлÿ пама, вĕсен тавра курăмне анлăлатма пулăшать.