23 июля 2008 г.
ЧР Президенчĕ Н.Федоров Чăваш Республикин Патшалăх Канашне янă “Малашлăхшăн паян ĕçлетпĕр!” Çырăвĕнче çапла каланă: “2008-2010 çулсенче 30 пине яхăн çемье хăйĕн пурăнмалли условийĕсене лайăхлатать...”
Патшалăхăн “Раççей гражданĕсене – туянма май пур тата хăтлă çурт-йĕр” наци проекчĕ пурнăçа кĕрсе пырать. Унпа килĕшÿллĕн çемьесем хăйсен пурăнмалли условийĕсене лайăхлатса пыраççĕ: хваттер туянаççĕ, çурт çĕклеççĕ. Район территорийĕпе илсен те “Çурт-йĕр” программăн “Çамрăк çемьесене çурт-йĕрпе тивĕçтересси” çумпрограмма ăнăçлă ĕçлет. Район администрацийĕн обществăлла инфратытăм тата коммуналлă хуçалăх аталанăвĕ енĕпе ĕçлекен пайĕн ертсе пыракан эксперт-специалисчĕ С.Г.Ильина пĕлтернĕ тăрăх, федераллă тĕллевлĕ программăпа килĕшÿллĕн хальлĕхе çамрăк çемьесене федераллă, республика тата вырăнти бюджетсенчен пурĕ 4 миллион та 647 пин те 750 тенкĕлĕх субсиди панă. Çак укçа хваттер хакĕн 40 процентĕнчен ытла мар. Палăртма кăмăллă, çак пулăшупа Хĕрлĕ Чутай район территорийĕнче ĕçлесе пурăнакан çамрăк специалистсем Алинăпа Федор Михеевсем, Маринăпа Анатолий Волковсем, Ольгăпа Валерий Фондеркинсем, Андрейпа Елена Ермолаевсем тата ыттисем усă курма пултарчĕç. Кăçал 36 çемье патшалăх пулăшăвĕпе усă курĕç, хăйсен пурăнмалли çурт-йĕр условийĕсене лайăхлатĕç. Хальлĕхе çурт-йĕр çĕклеме паракан субсиди илмелли свидетельствăна 10 çемье тивĕçнĕ – Хĕрлĕ Чутай ял тăрăхĕнчен 8, Кив Атикассипе Питĕркасси ял тăрăхĕсенчен – 1-шер çемье.
Çурт-йĕр ыйтăвĕ пурне те хумхантарать. Тин çеç çемье çавăракан мăшăрсемшĕн çак пулăшăвăн пĕлтерĕшĕ татах та пысăк. Çакă çамрăксене ялтах тĕплĕн тымар яма çул уçса пырать.