23 июля 2008 г.
“Нива” ял хуçалăх производство кооперативĕн ертÿçисем выльăх-чĕр¬лĕхрен продукци илессине ÿстерсе пырас тĕлĕшпе пуçаруллă ĕç¬леççĕ. Çу кунĕсенче йÿнĕ апатпа пĕлсе усă курни ку енĕпе ăнăçлă утăмсем тума май парать. Акă, кунта çулленех ĕнесен çуллахи лагерьне йĕркелеççĕ. Хальхи вăхăтра унта 210 пуç выльăх тытаççĕ. Ĕнесемпе пĕрлех пушмак пăрусем те пур.
Лагере çуллахи тапхăра тĕплĕ хатĕрленĕ. Дояркăсен ĕç условийĕсем япăх мар. Кĕтĕве ешĕл çаран çинче çÿретеççĕ. Плотина юнашарах, çавăнпа шыв çителĕклĕ.
– Паян кашни ĕне куллен вăтамран 10,8 килограмм сĕт антарать, – теççĕ ферма ĕçченĕсем. – Ку иртнĕ çулхинчен сахалрах-ха. Кăçалхи 6 уйăхра пĕр ĕне пуçне 1942 килограмм продукци илтĕмĕр. Пĕлтĕрхи çак тапхăрта 1887 килогрампа танлашнăччĕ. Урăхла калас пулсан, кăçалхи кăтарту 55 килограмм пысăкрах.
Çакна та палăртса хăвармалла. Кунта пĕтĕ¬мĕшле сăвăма 28 тонна чухлĕ ÿстернĕ. Сĕт сутассине лайăх йĕркеленĕ. Унăн таварлăхĕ 85 процент. Ял халăхĕнчен сĕт пухасси малалла пырать. Килĕрен пуçтарнă продукципе çамрăк выльăхсене çитернĕ çĕрте усă кураççĕ.
Паянхи куна хуçалăхра 570 пуç ĕне выльăх усраççĕ. Вăл шутра 170 пуç сумалли ĕне. Вĕсен йышне кăçал 10 пуç ÿстернĕ.
– Выльăхсен ăратлăхне лайăхлатса пымасан, вĕсене чухăн рационпа тăрантарсан, паллах, ÿсĕм тума йывăр, – теççĕ кооператив ертÿçисем. – Çакна тĕпе хурса эпир выльăх-чĕрлĕх тухăçлăхне ÿстермелли майсемпе туллин усă курма тăрăшатпăр. Фермăсене малалла аталантарас тата тупăш илессине ÿстерес ĕçре чи кирлĕ условисенчен пĕри – кĕтĕве анлăн çĕнетсе пыни, ĕнесемпе тына пăрусем хĕсĕр юлассине пĕтерни. Ĕне выльăхран ытларах продукци илес тесен унран пăру илмелле, ăна тĕрĕс-тĕкел пăхса ÿстермелле.
Хуçалăх кăçалхи ултă уйăхра пурĕ 22,8 тонна аш-какай туса илнĕ. Ку вăл, иртнĕ çулхи çак вăхăтрипе танлаштарсан, икĕ тонна нумайрах. Самăртма хупнă ĕне выльăхсем талăкра вăтамран 655-шер грамм ÿт хушса пынă. Кăçалхи кăтарту пĕлтĕрхинчен лайăхрах.
2007 çулхи кăтартусемпе хуçалăхри Карăкçырми ферми районта малтисенчен пĕри пулнăччĕ. Çулталăкра ĕне пуçне 3616 килограмм сĕт сунă кунта. Ĕçри çитĕнÿсемшĕн коллектива укçан преми парса хавхалантарнă.
Ÿсĕм хăй тĕллĕн пулмасть, ăна тăрăшуллă та хастар çынсем туптаççĕ. Акă, Елена Жукова техник-осеменаторах илер. Вăл ĕнесене искусственнăй майпа пĕтĕлентерекен операторсен районти конкурсне хутшăнса çĕнтерÿ тунă. Ăна район администрацийĕн Хисеп грамотипе наградăланă.
Пĕтĕмĕшле илсен, “Нива” ял хуçалăх кооперативĕнче зоотехнипе ветеринари ĕçĕсен комплексне пурнăçласа пыма тăрăшаççĕ. Çакă ÿсĕм çулĕ çине çирĕппĕн тăма пулăшать те.