23 июля 2008 г.
Контракт шучĕпе аслă пĕлÿ илме ĕмĕтленекенсен кăçал чи малтанах çемьери тупăш мĕн чухлĕ пулассине тĕплĕн шута илмелле. Хаксем ÿснине И.Н.Ульянов ячĕллĕ Чăваш патшалăх университечĕн йышăну комиссийĕнче те пĕлтерчĕç. Пĕлтĕр строительство факультечĕн студенчĕсем çулталăкне вĕренÿшĕн 35 пин тÿленĕ пулсан кăçал вара – 90 пин тенкĕ кăларса хумалла. Пулас шăл тухтăрĕсен – 95 пин. Паянхи куна вăл чи нумай укçа «ыйтакан» професси. Юридици уйрăмĕнче 30 пинрен 60 пин тенке çитнĕ. Ытти вĕренÿ заведенийĕнче те хаксем ÿснĕ, анчах 2-3- хут мар. Ял хуçалăх академийĕпе И.Я.Яковлев ячĕллĕ педуниверситетра 10-15 процент таран. Академире пулас «банкирсен» çулталăкне – 35, агрономсен 17,4 пин тенкĕ тÿлемелле.
Республикăра пурĕ 22 аслă вĕренÿ заведенийĕ, вĕсенчен 15 патшалăхăн (4 – уйрăм ĕçлекен, 11 филиал), 7 – патшалăхăн мар (3 – уйрăм ĕçлекен, 4 филиал). Пĕлтĕр предприяти-организацисем ыйтнипе пирĕн университет-институтсенче строительство, машиностроени, электроэнергетика, хими промышленноç енĕпе çĕнĕ 24 специализаци уçнă. Вĕренме кĕрекенсем вара харăсах темиçе заведение те заявлени пама пултараççĕ. Ун чухне вара университет-институтăн ятне-сумне çеç мар, енчĕк туллипе тулли маррине те шута илмелле.