2009.05.36-37 Ĕç пулсан ялтах лайăх

«Коминтерн» ЯХПК-ра бухгалтерта тăрăшакан Марина Николаевна Данилова ĕçри ÿсĕмсемшĕн кăçал ЧР Президенчĕн стипендиачĕ пулса тăчĕ.

М.Н.Данилова хуçалăхра 2002 çултанпа тăрăшать. Çамрăк хĕр Шупашкарти экономикăпа технологи колледжĕнче ăс пухнă. Хулара юлас темен вăл. Бухгалтер профессине алла илсен тăван тăрăха таврăннă та ĕçе пуçăннă. Малтанласа диспетчерта вăй хунă, ĕç опычĕ хушăнса пынă май ăна бухгалтер тивĕçне шаннă. Пилĕк çул ĕнтĕ вăл шут ĕçне йĕркелесе пырать. Хуçалăх ертÿçи те, ĕçтешĕсем те çамрăк специалистăн тăрăшулăхĕпе кăмăллă, хĕр ЧР Президенчĕн стипендине илсе тăма тивĕçлине палăртаççĕ.

Сăмах май, паян «Коминтерн» ЯХПК лайăх аталанса пыракан хуçалăхсен йышĕнче. Кунти ĕçченсем вăйлă тыр-пул ÿстереççĕ, сĕт, аш-какай туса илессипе те малтисен ретĕнче. Выльăх-чĕрлĕхе чĕрĕ ÿт хуштарассипе тăрăшса ĕçлеççĕ. Техника паркĕ пуянланса пыни куç умĕнчех. Апла пулсан, хуçалăхăн ырă ĕçĕсенче М.Н.Данилован тÿпи те пурах-тăр.

Пирĕн хушăра Марина пек пултаруллă, ял ĕçне кăмăллакан специалистсем татах та пулччăр. Шоровăра пурăнакан, халĕ ĕнтĕ икĕ ача амăшĕ, çамрăк бухгалтер ял пурнăçне суйласа илнишĕн ÿкĕнмест. «Ку пурнăçра хамăра шансан, ĕç, çемье юнашар пулсан ялта та пурăнма интереслĕ», – тет М.Н.Данилова.

Л.Шивиркина