2009.08.26 Патшалăх премине тивĕçнĕ

Ăслăлăхра, техникăпа производствăра, культурăпа искусствăра, вĕрентÿре, çамрăксен политикинче, сывлăх сыхлавĕнче, тавралăха сыхлас ĕçре, физкультурăпа спортра пысăк çитĕнÿ тăвакан çамрăксене çулсеренех Çамрăксен патшалăх премийĕпе хавхалантараççĕ. Асăннă хавхалантарăва кăçал тивĕçнĕ пултаруллă çамрăксен йышĕнче пирĕн ентеш Лилия Харитонова пурри çав тери савăнтарать. И.Я.Яковлев ячĕллĕ ЧППУ-н француз чĕлхи кафедрин заведующийĕ, педагогика ăслăлăхĕн кандидачĕ, вĕрентÿÿ, воспитани тата çамрăксен политики енĕпе çĕнтернĕ пике вăтам пĕлĕве Хĕрлĕ Чутайри шкулта илнĕ. Унтан вăл И.Я.Яковлев ячĕллĕ ЧППУ-н ют чĕлхесен факультетне пĕтернĕ, ăна тăван университетрах ĕçлеме хăварнă. Лилия 2005 çулта диссертаци хÿтĕленĕ. Тепĕр çултанах мал ĕмĕтлĕ пикене кафедрăна ертсе пыма шаннă.

– 5-мĕш класра вĕреннĕ чухне француз чĕлхине килĕштертĕм. Зинаида Павловна Ямброськина учитель пулăшнипе ют чĕлхене юратса вĕрентĕм, пурнăçа унпа çыхăнтарма тĕв турăм, – пĕлтерет педагог.

Компьютер тытăмĕ анлă сарăлнă тапхăрта уроксенче информаци технологийĕсемсĕр май çуккине аван ăнланать çамрăк преподаватель. Çавăнпа "Ют чĕлхен пулас вĕрентекенĕсене професси ĕçĕ-хĕлĕнчи информаци технологийĕсемпе усă курма хатĕрлесси" пособи кăларма шут тытнă. Шăпах çак ĕçшĕн ĕнтĕ Лилия Харитонова Çамрăксен патшалăх премине тивĕçнĕ те ĕнтĕ. Хастар та пултаруллă ентеше малашне те ĕмĕт-тĕллевне пурнăçласа пыма ăнăçу сунас килет.

Н.ПЕТРОВА.