Каçхине вара, августăн 21-мĕшĕнче", Культурăпа кану центрĕ" автономи учрежденийĕ умĕнче студентсемпе çамрăксен "Пуласлăх пирĕнте" фестивалĕ иртрĕ. Унта район пуçлăхĕ А.Криков хутшăнчĕ, студентсене, çамрăксене, пурне те уяв ячĕпе саламларĕ, ăнăçу, сывлăх сунчĕ. Александр Иванович хăйĕн сăмахĕнче район малашлăхĕшĕн ĕçлекен яш-кĕрĕмпе мухтаннине палăртрĕ, тăван тăрăха таврăнма кăмăл тăвакан çамрăксене яланах хапăл туса кĕтнине каларĕ. Унтан вăл район аталанăвĕшĕн ĕçлекен пултаруллă çамрăксене район пуçлăхĕн премийĕпе чысларĕ. Ку пысăк чыса кăçал район больницин хирургĕ Николай Александрович Ярабаев, Штанашри тĕслĕх вулавăшăн библиотекарĕ Валентина Валериановна Чучакова, "Центральное" кафе поварĕ Татьяна Александровна Кадушкина, Хĕрлĕ Чутай шкулĕн учителĕ Сергей Владимирович Егоров, "Нива" ял хуçалăх предприятийĕн ертÿçи Владимир Иванович Мурайкин тивĕçрĕç.
Фестивалĕн программипе килĕшÿллĕн, ял тăрăхĕсенчен килнĕ студентсемпе çамрăксен ушкăнĕ хăйсен пултарулăхĕпе савăнтарчĕ. Сцена çине чи малтан Атнар ял тăрăхĕ тухрĕ. Хĕр упраçсем хăйсемпе паллаштарчĕç. Акă, вĕсенчен пĕри Шупашкар хулинче технолога вĕренет. Алла диплом илсенех районти çăкăр заводне ĕçлеме килетĕп, тет. Мĕнех, хĕр пĕрчи сăмахне тытсан ăна мухтамалли çеç юлать. В.Волкова, Т.Огонькова куракансене юрăсем парнелерĕç. Унтан Мăн Этмен ял тăрăхĕнчи çамрăксем хăйсен ăсталăхне кăтартрĕç. Т.Галкинапа О.Чернова "Вĕри тунсăх куççулĕ" юрăпа тухрĕç. Е.Ильина та юлташĕсем пекех юрларĕ. Хĕрлĕ Чутай ял тăрăхĕн çамрăкĕсем сцена çине тухсан район, республика, патшалăх малашлăхĕ хăйсенче пулнине палăртрĕç. А.Быков, С.Ильина халăх умне юрăпа тухрĕç. А.Быков Хĕрлĕ Чутай çинчен шăрантарнă юрра пурте алă çупса йышăнчĕç. Д.Ильина гимнасткăн пултарулăхне халăх куç сиктермесĕр пăхрĕ. Питĕркасси ял тăрăхĕн çамрăкĕсем те аван номерсемпе асра юлчĕç. Юлашкинчен сцена çине Штанаш ял тăрăхĕн «Даешь, молодежь!» ятлă çамрăксен ушкăнĕ тухрĕ. Кĕске вăхăт хушшинче вĕсем юрларĕç, ташларĕç, туслăх пуринчен те пахине палăртрĕç. Калас пулать, штанашсен кашни сăмахĕ пĕлтерĕшлĕ. Юрă йĕркисенче чăваш халăхне çутта кăларнă И.Яковлевăн халалĕ хывăннă.
Пултаруллă çамрăксем ÿсеççĕ Штанаш тăрăхĕнче. Ахальтен мар вĕсем студентсемпе çамрăксен "Пуласлăх пирĕнте" фестивалĕнче пĕрремĕш вырăна тухрĕç. Иккĕмĕш вырăнта – Атнар ял тăрăхĕнчи çамрăксен ушкăнĕ, виççĕмĕш – Хĕрлĕ Чутай. Çĕнтерÿçĕсене парнесемпе хавхалантарчĕç. Шел пулин те, фестивале пур ял тăрăхĕ те хутшăнман. Вĕсенче нивушлĕ пĕр çамрăк та çук;
Фестивалĕн сĕмне чăваш юрăçисем П.Ермолаевпа А.Шадриков пуянлатрĕç. Туканашра çуралса ÿснĕ, республикăн тĕп хулинче тĕпленнĕ И.Шинжаев юррисене те халăх алă çупса йышăнчĕ. Палăртмалла, И.Шинжаев уявра Хĕрлĕ Чутай çинчен юрăсем шăрантарчĕ.
Аван иртрĕ фестиваль. Вăл Чутай ен çамрăкĕсем талантлă, пултаруллă, хастар пулнине кăтартрĕ. Мухтанатпăр эпир район çамрăкĕсемпе!
Л.ЗАЙЦЕВА.