2009.11.07 Çĕр ĕçĕн паттăр ывăлĕсем

Çĕр ĕçченĕн çулталăкĕнче уй-хир ĕçченĕсем татах та тăрăшарах ĕçлени куç умĕнче. Акă, кăçал ял хуçалăх кооперативĕсемпе колхозсем тата фермер хуçалăхĕсем 8440 гектар çинчи тыр-пула пĕр тăккаламасăр пухса кĕртрĕç. 18734 тонна пĕрчĕллĕ тата пăрçа йышши культурăсене кĕлете хыврĕç. Ку пĕлтĕрхи кăтартупа танлаштарсан 7000 тонна ытларах. Уй-хир паттăрĕсем кашни гектартан 22,8 центнер тухăç илме пултарчĕç. Уйрăм хуçалăхпа илсен атнарсен тыр-пул тухăçĕ вăтамран 35,9 центнерпа танлашрĕ, "Свобода" – 33,8, "Нива" – 31,6, "Дар-Бройлер" – 25.

"Хир карапĕсен" хуçисем вырма вăхăтĕнче тыр-пул тухăçĕшĕн нумай тăрăшрĕç. Вĕсем кунне-çĕрне пĕлмесĕр, вăй-халне шеллемесĕр хăйсене шанса панă техникăна пĕр тикĕс ĕçлеттерчĕç, çитĕнÿ турĕç. Акă, Туканашри "Дар-Бройлер" обществăри Юрий Владимирович Баринов "Полесье" комбайнпа, ăна кăçал çеç туяннă, 2377 тонна тырă вырса тĕшĕленĕ. Вăл тивĕçлипех кăçалхи вырма чемпионĕ пулса тăнă. "Коминтерн" ЯХПКри И.Н.Пономарев, Ю.Н. Степанов, "Свобода" колхозри Г.П.Кокорев та вырма тапхăрĕнче ĕç ăмăртăвĕнче çĕнтернĕ.

Кăçалхи вырмара мала тухнă комбайнерсене районти Ял хуçалăх ĕçченĕсен кунĕнче "Вырма чемпионĕ-2009" ят парса чысларĕç.

Л.Шивиркина