2009.11.18 «Дизайнера вĕреннипех çырлахмăп»

Уйпуç ялĕнче çуралса ÿснĕ Нина Тарасова хальхи вăхăтра Шупашкарта ОАНО СПК "Академи" колледжĕнче 3-мĕш курсра вĕренет. Вăл реклама енĕпе ĕçлекен дизайнер специальноçне суйласа илнĕ.

– Тăххăрмĕш класра вĕреннĕ чухне учительсем тăтăшах тĕрлĕ професси çинчен сăмах пуçаратчĕç. Эпĕ дизайнер пулма шут тытрăм. Çавăнпа та 9-мĕш класс пĕтерсенех Шупашкара çул тытрăм. Тепре каласан, пăртак ППЭ-рен те хăрарăм пулĕ, – сăмахне пуçларĕ 18 çулхи хĕр пĕрчи. – Хулари пурнăç, студент пурнăçĕ мана килĕшет. Темшĕн-çке вăл питĕ хăвăрт иртет. Тата тепĕр курс çеç вĕренмелли юлчĕ.

Çамрăк хĕр упраç колледжран вĕренсе тухсан дизайн енĕпех пурнăçне çыхăнтармасса та пултарнине палăртать.

– Тен, анне суйласа илнĕ çул-йĕрпе – вăл çынсен сывлăхне çирĕплетессишĕн ĕçлекен медицина сестри – кайăп. Пурнăç кăтартĕ-ха, – тет Н.Тарасова. – Çакна çирĕппĕнех пĕлетĕп: дизайнера вĕреннипех çырлахмăп, пĕлĕве ытти енĕпе те ÿстерме тăрăшăп.

Ĕмĕтÿсем пурнăçланса пыччăр, Нина. Студент пурнăçĕпе туллин пурăн.

Л.Сергеева