2009.11.21 Машинистсен ăмăртăвĕнче çĕнтернĕ

II Хурашашра пурăнакан Егор Михайлович Варламов кăçал «Победа» ЯХПК-н йĕтемĕ çинче тырă аласа тасатакан машинăсене тикĕс ĕçлеттерсе тăнă. Ял хуçалăх ĕçченĕсен кунĕнче ĕç ăмăртăвĕн çĕнтерÿçи пулса тăнă. Ăна ку ĕçре ялти çамрăк – А.Мельников пулăшса пынă. Вĕсем тата ял çыннисем тăрăшнипе уйран килнĕ мĕн пур тырра тасаласа (579 тонна пĕрчĕллĕ тата пăрçа йышши культурăсене) кĕлете хывса хăварнă. Вăл шутран 195 тонна кондициллĕ вăрлăх.

– Ял хуçалăхĕнче 30 çул ытла вăй хуракан Е.Варламова шанма пулать. Вăл тĕрлĕ техникăпа ĕçлеме пултаракан çын. Вырма тапхăрĕнче те вăй-хала шеллемесĕр тырă аламалли машинăсемпе ĕçлерĕ. Вăл тăрăшнăранах уйран килнĕ тырă вăхăтра кĕлете кĕрсе пычĕ. Хамăр ĕçченсемпе чăннипех мухтанатпăр, – терĕ хуçалăх ертÿçи П.Любимов.

Л.ШИВИРКИНА.