2010.02.17 Вĕсен паттăрлăхне манма юрамасть

Çулсерен вăрçă тапхăрĕ инçеленсе пырать. Анчах та хĕрÿ çапăçура пулнисен асĕнчен вăл нихăçан та тухмĕ. Совет салтакĕ фашистсене хирĕç хăюллăн пăхнă, унăн юнĕпе, вăйĕпе хăрушă тăшмана çĕнтернĕ. Вĕсен паттăрлăхне манма юрамасть.

Аслă Çĕнтерĕве 65 çул çитнине халалласа районта "Инçетри ветерана – халăх тимлĕхĕ тата пулăшăвĕ" акци иртет. Акă, Çĕн Атикасси шкулĕн волонтерĕсем акципе килĕшÿллĕн Кив Атикасси тăрăхĕнчи Тăван çĕршывăн вăрçин 5 ветеранне пăхса тăраççĕ: çуртсенче тирпей-илем кÿреççĕ, выльăх-чĕрлĕхе пăхса пулăшаççĕ. Уйрăмах А.Дерстугановапа В.Чертова класс ертÿçисем ертсе пыракан 5 тата 7 класс ачисем хастарлăх кăтартаççĕ.

Ачасем килмессерен ветерансен сăн-пичĕ çуталать, хăйсене манманни вĕсене пурăнма шанчăк парать.

Л.Зайцева.