2010.02.17 Аслă Çĕнтерĕве халалласа

Нумай пулмасть Питĕркасси вăтам шкулĕнче Аслă Çĕнтерĕве 65 çул çитнине халалласа наукăпа практика конференцийĕ иртнĕ. Унта 8-10 классенче вĕренекенсем вăрçă хирĕнче паттăрлăх кăтартнă ентеш-ветерансем çинчен çырнă тĕпчев ĕçĕсемпе паллаштарнă. Конференцие пурĕ тăхăр ĕç тăратнă.

«Война в моей семье» номинацире Хĕрлĕ Чутайри Е. Звонникова (10 класс) пĕрремĕш вырăн йышăннă. Екатерина хăй ĕçĕнче йăх-тымарти вăрçă участникĕсем çинчен туллин уçса панă. Унăн ашшĕ те, А.Фондеркин (Атнарти истори учителĕ), Чечен вăрçин вут-çулăмĕ витĕр тухни çинчен çырса кăтартнă. Иккĕмĕш вырăнсене В.Шевченкопа (Атнар) А.Крыжайкин (Мишеркасси) пайланă.

«Земляки» номинацире Питĕркассинчи О.Михопарова (10 класс) палăрнă. Ольга Кÿпеш ялĕнчи фронтовиксен, тыл ĕçченĕсен паттăрлăхĕ пирки паха материал пухса хатĕрленĕ. Пĕрремĕш ракетчик А.Захаров пирки Хусанушкăнчи А.Федоровпа Шулюри М.Медакина (8 класс) тĕпчев ĕçĕ хатĕрленĕ. Вĕсем иккĕмĕш вырăна тивĕçнĕ.

Л.МЕДВЕДЕВА.