2010.03.27 Çĕнтерÿ кунне хатĕрленетпĕр

ЧР Министрсен Кабинечĕн Председателĕн çумĕ – сывлăх сыхлавĕпе социаллă аталану министрĕ Нина Суслонова Тăван çĕршывăн Аслă вăрçинче çĕнтернĕренпе 65 çул çитнине уявлассине хатĕрленес енĕпе ĕçлекен йĕркелÿ комитечĕн ларăвне ирттернĕ.

Культура министрĕ Роза Лизакова уяв умĕн палăксемпе обелисксене реставрацилес, вăрçа хутшăннисене пытарнă вырăнсене тирпейлес ĕçсемпе паллаштарнă. Ларура палăртнă тăрăх, республикăра Аслă вăрçăпа, ытти çапăçупа çыхăннă асăну вырăнĕсемпе сооруженисен реестрне хатĕрленĕ, унта – 1010 объект. Районсемпе хуласенче вăрçăпа, паттăрсемпе çыхăннă палăксемпе обелисксене, асăну хăмисене анлăн çĕнетеççĕ.

Республикăн çар комиссарĕн тивĕçĕсене пурнăçлакан Александр Исаев Çĕнтерÿ парадне хатĕрленни çинчен каласа панă. Сывлăх сыхлавĕн министрĕн çумĕ Людмила Рулькова вăрçа хутшăннисен, инвалидсен социаллă пурнăçпа экономика лару-тăрăвне лайăхлатас, сывлăхне çирĕплетес енĕпе пысăк ĕç пурнăçлани çинчен пĕлтернĕ. Мĕн пур сиплев учрежденийĕнче ветерансен сывлăхне тĕрĕслеççĕ, çав шутра вĕсем патне килсерен çÿрекен бригадăсем йĕркеленĕ. Тĕрĕслев кăтартăвĕсене тĕпе хурса сиплев мероприятийĕсем ирттереççĕ.

Тепĕр самант: Чăваш Енре пурăнакан 45 пин ытла ветерана Тăван çĕршывăн 1941-1945 çулсенчи Аслă вăрçинче çĕнтернĕренпе 65 çул çитнĕ ятпа кăларнă юбилей медалĕпе наградăланă. Март уйăхĕн 20-мĕшĕ тĕлне пысăк йыш, 30 пине яхăн çын, çак наградăна илнĕ. Ку ĕç малалла пырать. Раççей Президенчĕн Указĕпе килĕшÿллĕн апрель уйăхĕнче вăрçă ветеранĕсене, салтаксен тăлăх арăмĕсене тата концлагерьсенче нуша тÿснисене Çĕнтерĕвĕн 65 çулĕ ячĕпе пĕр хут укçа тÿлесе хавхалантарĕç.

К.Николаев