2010.05.12 Çырав хучĕсене пичетлеме пуçланă

Кăçалхи Пĕтĕм Раççейри çырав пуçланиччен "Гознак" ФГУП çырав хучĕсен 234 миллион ытла бланкне хатĕрлĕ. 19 пине яхăн çырав хучĕсене пичетленĕ те ĕнтĕ, вĕсене Ямал-Ненец автономи округне ăсатнă, мĕншĕн тесен унти çитме йывăр пурăнмалли районсенче апрель уйăхĕн пуçламăшĕнчех халăх çыравĕ иртнĕ. "Гознак" специалисчĕсем çырав хучĕсене пичетлес ĕçе августăн 25-мĕшĕччен вĕçлеме палăртаççĕ. Сăмах май, РФ Правительстви çырав хучĕсене пичетлес ĕçе ахальтен мар ку учреждение шанса панă. 2002 çулхи çырав валли те бланксене "Гознак" ĕçченĕсем хатĕрленĕ. Кунта хальхи вăхăтри хăватлă оборудовани пур, пысăк квалификациллĕ кадрсем ĕçлеççĕ, пахалăхлă продукцие пысăк тиражпа кăларма майсем çителĕклĕ.

Çырав хучĕсем машин вуламалли икĕ енлĕ А4 форматлă документ шутланаççĕ. Суя çырав хучĕсенчен хăтăлас тесе "Гознак" специалисчĕсем ятарлă хÿтлĕхлĕ хут туса хатĕрленĕ. Çырав хучĕ çине çырса хунине каярахпа улăштарма пулмасть, хута "тасатасран" ятарлă хими хÿтлĕхĕ сыхлать. Кунсăр пуçне информацие автоматизаци йĕркипе пăхса тухма май пур. Бланксене хатĕрленĕ чухне хăвăрт типекен, анчах та тĕсне инфрахĕрлĕ пайăркасемпе нумай вăхăт хушши çутатсан та çухатман сăрăсемпе усă кураççĕ.

Çырав хучĕ çутă персик тĕслĕ. Анкета ыйтăвĕсене тата пăнчăллă рамкăсене хура тĕспе пичетлеççĕ. Сулахайри çÿлти кĕтесре халăх çыравĕн эмблемине вырнаçтарнă. Кашни страницăн аялти пайĕнче "Конфиденциально" тесе çырнă. "Пĕтĕм Раççейри халăх çыравĕ çинчен" саккунпа килĕшÿллĕн çырав хучĕсенчи сведенисем конфиденциаллă информаци шутланаççĕ.

Сведенисене пăхса тухас процеса санкцисĕр хутшăнассинчен хÿтĕленĕ. Ку ĕçе хутшăнакан должноçри çынсем вара çухатнăшăн, сведенисене пĕлтернĕшĕн е ылмаштарнăшăн РФ саккунĕпе килĕшÿллĕн явап тытма пултараççĕ. Çырава пĕтĕмлетсен мĕн пур çырав хутне тĕп тăвĕç.

"Çырав – 2010" федераллă пресс-центр материалĕсем тăрăх Н.ПЕТРОВА хатĕрленĕ.