Пирĕн аттене, Николай Николаевич Михопаркина, вăрçа 1941 çулхине илсе кайнă. 1942 çулта аннене, Анна Григорьевнана, почтальон атте Великие Луки çывăхĕнчи çапăçура хыпарсăр çухалнине пĕлтерекен хут илсе килсе панă. 1956 çулта вара виçĕ ачапа тăлăха юлнă анне чирлесе çĕре кĕчĕ.
Çапла, халĕ темиçе вуншар çултан эпир аттен вил тăприне тупрăмăр. Ăна тупма пире Шулю ялĕнче çуралса ÿснĕ Галина Ильинична Михеркина пулăшрĕ. Паянхи кун Г.Михеркина Великие Луки хулинче ĕçлесе пурăнать.
Аттене Великие Луки хуларан вунă километрта вырнаçнă ял патĕнче пытарнă. Унти музейри хутсем тăрăх çав вырăнта сакăр пин салтак канлĕх тупнă: 3668 çыннăн хушамачĕсем паллă, ыттисенне пĕлеймен.
Николай ывăлăмпа Великие Луки хулинче апрелĕн 20-23-мĕшĕсенче пултăмăр. Аттен вил тăприйĕ çине сăн ÿкерчĕкне лартса хăвартăмăр, чечексем хутăмăр.
Калас пулать, 1943 çулта асăннă хуларан инçех мар Совет Союзĕн Геройĕ Александр Майоров та вилнĕ, ун ячĕпе кунта палăк та лартнă.
Архиври документра çинче пирĕн атте пирки çапларах çырнă: "Убит 9 января 1943 года, за высоту 178,1, д. Печогда, Новосокольнический район, Калининская область – курсант".
Н.МИХОПАРКИН,
Шулю ялĕ.