Аслă Çĕнтерĕве халалланă уяв фейерверкĕсем, йăлана кĕнĕ çар парачĕсен çĕнтерÿллĕ фанфарисем иртсе кайрĕç, Чăваш патшалăх культурăпа искусство институтĕнче вара яланхилле вăрçă çулĕсенчи юрăсен концерчĕ ăнăçлă иртрĕ. Унта РФ искусствăн тава тивĕçлĕ ĕçченĕ, ЧР тата РФ культурăн тава тивĕçлĕ ĕçченĕ С.А.Кондратьев профессор хатĕрленĕ студентсем хутшăнчĕç. Станислав Кондратьев çулсеренех институтра çакăн пек концерт йĕркелеме хăнăхтарчĕ.
Майăн 6-мĕшĕнче институтăн концерт залĕнче чуна хаклă, çывăх юрăсем янăрарĕç. Вĕсем шăпăрлансене те , шурă çÿçлĕ ветерансене те ăнланмалла.
Хальхи концертра 2007 çулхи выпускниксем, паянхи кун Чăваш патшалăх оперăпа балет театрĕн солисчĕсем Николай Ивановпа халăхсем хушшинчи конкурсăн лауреачĕ Константин Москалев (2000 çулхи выпускник), Чул хулари патшалăх академийĕн оперăпа балет театрĕн солисчĕ Михаил Наумов, ЧР культурăн тава тивĕçлĕ ĕçченĕ Тамара Локтева (вăл вĕренĕве профессорăн класĕнче 36 çул каялла вĕçленĕ) хăйсен ăсталăхĕпе паллаштарчĕç.
Станислав Алексеевичăн вĕренекенĕсем хушшинче талантлă ачасем чылай. Сăмахран, Ю.Катков. Вăл Чăваш патшалăх филармонийĕн солисчĕ ĕнтĕ. "Эх, çулсем" юрра О.Андреев ăнăçлă юрларĕ. "Ăçта эсир халĕ, пĕр полкри туссем;" тесе ыйтрĕ опера театрĕн солисчĕ И.Гурьев. Халăх кăмăлне Ю.Волков çамрăк тенор кайрĕ. 1, 3, 5-мĕш курссенче вĕренекенсем шăрантарнă юрăсем те кашнин чунне хускатрĕç.
Малтанхи вĕренекенсем те ăсталăхĕсене кăтартрĕç. Н.Ивановпа К.Москалев юрласса куракансем чăтăмсăррăн кĕтрĕç. Юрăçсем куракансен кăмăлне тивĕçтерчĕç.
Йошкар-Оларан та хăна пулчĕ. Вырăс романсĕсене шăрантаракан Светлана Белоуса маэстропа туслă çыхăну тытни Чăваш Енпе çывăхлантарнă. Вăл час-часах Шупашкарта пулать.
Шăпах çапла – туслă та чуна кăмăллă атмосферăра иртрĕ концерт.
К.МОСКАЛЕВ.