2010.07.10 Çырава тивĕçлĕ хатĕрленсе ирттересчĕ

Пĕтĕм Раççейри халăх çыравĕ кăçал октябрĕн 14-25-мĕшĕсенче иртет.

Район администрацийĕн ертÿçи Ю.И.Иванов иртнĕ кĕçнерни кун патшалăх статистикин федераллă службин Чăваш Республикинчи территори органĕн ертÿçине Эльвира Максимована тата çÿлерех асăннă службăн районти специалист-экспертне Наталья Чишкинана йышăннă. Тĕл пулура район территорийĕнче халăх çыравне тивĕçлĕ хатĕрленсе ирттерес ыйтăва сÿтсе явнă.

Паянхи куна районта çырав ирттерме пÿлĕмсемпе вăхăтлăх çырав персоналне (84 çын) уйăрнă. Хĕш-пĕр ял тăрăхĕсенче адрес хуçалăхне йĕркене кĕртсе, çуртсен номерĕсене, урамсен ячĕсене пур çĕрте те вырнаçтарса çитермелле.

Калас пулать, çитес çул пирĕн çĕршывра тепĕр çырав пулать. Вăл экономика сферипе, пур харпăрлăхри предприятисен тата уйрăм предпринимательсен ĕçĕпе çыхăннă.

Çавăн пекех çакна каламалла: район администрацийĕн пуçлăхĕпе Ю.Ивановпа Чăваш Енри статистика службин ертÿçи Э.Максимова райадминистраципе Чăвашстат пĕр-пĕринпе ĕçлесси пирки калаçса татăлнă. Палăртмалла, статистика информацийĕ управлени енĕпе районти халăхăн пурнăç пахалăхне лайăхлатма хистекен тĕрĕс йышăнусем тума май парать.

Н.ПЕТРОВА.