2010.12.15 Педагогсем асран тухмаççĕ

Эпĕ Хĕрлĕ Чутай районĕнчи «Свобода» колхоза кĕрекен Акташ ялĕнче çуралса ÿснĕ, кăçал 44 çул тултартăм. Ача чухне аннепе пĕрле асăннă хуçалăхра сахал мар вăй хунă. Элĕк районне кĕрекен юнашарти Мăн Ямашра сакăр çул шкулта ăс пухрăм. Яманкассинчи Ольга Андреевна Данилова тата ытти педагогсем халĕ те асран тухмаççĕ.

Сăн-сăпачĕпе çеç мар, кăмăлĕпе те илĕртÿллĕскер хăйĕн çепĕç сассипе лирикăплă юрăсене артистсенчен те кая мар шăрантаратчĕ. Анчах та вăл – юрăç мар, акăлчан чĕлхи учительници. Суйласа илнĕ профессипе ку шкулта (1975-2009) хĕр чухнех ĕçлеме пуçланă та 34 çул сисĕнмесĕрех иртсе кайнă. Çав шутран Çĕн Атикассинчи вăтам шкулта та пĕр çул ĕçлеме ĕлкĕрнĕ. Виçĕ ача амăшĕ халĕ мăшăрĕпе пĕрле килте тăрмашать.

Э.НИКИТИНА.